Një krim i rëndë ka tronditur Gjermaninë, ku një 63-vjeçar ka vrarë katër anëtarë të familjes së tij – gruan, motrën dhe dy djemtë – para se t’i jepte fund edhe jetës së vet. Ngjarja ka ndodhur në rajonin Reutlingen, ndërsa autori ishte person me leje gjuetie dhe kishte armë në pronësi.
Policia gjermane ka bërë të ditur se të pesë viktimat janë vrarë me armë zjarri. Katër prej tyre – motra 60-vjeçare, gruaja 57-vjeçare dhe djemtë 27 dhe 29 vjeç – janë gjetur të vdekur në lokacione të ndryshme brenda qytetit. Dyshimet e para dolën në pah pasi një kujdestar gjeti motrën e autorit pa shenja jete në apartamentin e saj të martën në mëngjes.
Pas zbulimit të viktimës së parë, forcat speciale të policisë ndërhynë në shtëpinë e autorit. Aty gjetën të vdekur 63-vjeçarin dhe bashkëshorten e tij, të goditur me armë zjarri. Arma e krimit ishte pranë trupit të autorit. Më vonë, në një ndërtesë tjetër, u gjetën edhe trupat e dy djemve të tij.
Hetimet kanë nisur për të zbardhur motivet e këtij akti të rëndë që ka tronditur opinionin publik në Gjermani.