Ministri në detyrë i Financave, Punës dhe Transfereve, Hekuran Murati, ka reaguar ndaj premtimeve të opozitës lidhur me shtesat për fëmijë, duke i quajtur ato të pasinqerta dhe kontradiktore me veprimet e tyre gjatë dy dekadave të fundit.
Sipas Muratit, opozita fillimisht kishte deklaruar se nuk kishte buxhet për shtesa për fëmijë, ndërsa më pas, kur qeveria siguroi mjetet dhe nisi zbatimin e skemës, i kishte cilësuar ato si të pamjaftueshme dhe i kishte përqeshur publikisht.
“Tash kur i rritëm e do t’i dyfishojmë përsëri në 90 euro në muaj për mandatin që vjen, opozita kanë filluar e po premtojnë se do t’i bëjnë shtesat nga 50 euro në muaj”, ka shkruar Murati.
Ai ka ngritur dyshime mbi besueshmërinë e këtyre premtimeve, duke theksuar se për rreth 20 vjet qeverisje, opozita aktuale nuk kishte ndërmarrë asnjë politikë konkrete për mbështetjen financiare të fëmijëve në Kosovë.
Postimi i Muratit vjen në kohën kur debati për politikat sociale dhe mbështetjen e familjeve është intensifikuar, veçanërisht në prag të zgjedhjeve të ardhshme.
Postimi i plotë:
Opozita dhe shtesat për fëmijë
Shtesat për fëmijë fillimisht thanë që nuk bëhen, sepse s’ka buxhet.
Pastaj kur u gjet buxheti dhe u bënë shtesat, thanë që janë pak e i përqeshën si vitra.
Tash kur i rritëm e do t’i dyfishojmë përsëri në 90 euro në muaj për mandatin që vjen, opozita kanë filluar e po premtojnë se do t’i bëjnë shtesat nga 50 euro në muaj.
Por a ka kush që u beson opozitës, të cilët për 20 vite me radhë asnjëherë nuk u kujtuan që Kosova kishte fëmijë dhe duhej mbështetur?