Shtetet rikthejnë kontrollet kufitare të epokës Covid
Një shpërthim i një virusi vdekjeprurës në Indi ka ringjallur frikën për një pandemi të re në Azi, duke detyruar disa vende të rikthejnë kontrollet shëndetësore në aeroporte, të ngjashme me ato të periudhës së Covid-19, për të parandaluar përhapjen e tij.
Autoritetet shëndetësore në rajon kanë rritur masat parandaluese pasi në shtetin indian të Bengalit Perëndimor u konfirmuan pesë raste të virusit Nipah – një infeksion i rrallë, por jashtëzakonisht i rrezikshëm, që transmetohet nga lakuriqët e natës dhe mund të infektojë si kafshët ashtu edhe njerëzit.
Virusi monitorohet nga afër nga ekspertët e shëndetit publik, pasi mund të kalojë nga kafshët te njerëzit dhe, në disa raste, edhe nga njeriu te njeriu. Aktualisht nuk ekziston as vaksinë e miratuar dhe as trajtim specifik me ilaçe.
Infektim në ambient spitalor
Shpërthimi i fundit lidhet me një spital privat në Bengalit Perëndimor, ku të paktën pesë punonjës shëndetësorë u infektuan më herët këtë muaj. Autoritetet kanë vendosur në karantinë rreth 110 persona që kanë pasur kontakt me të infektuarit.
Një mjek, një infermiere dhe një anëtar tjetër i stafit rezultuan pozitivë, pasi dy rastet e para u zbuluan te një infermier dhe një infermiere nga i njëjti distrikt.
Sekretari i Përgjithshëm i Departamentit të Shëndetësisë dhe Familjes në Bengal, Narayan Swaroop Nigam, deklaroi se njëra nga infermieret ndodhet në gjendje kritike, në koma, pasi zhvilloi temperaturë të lartë dhe probleme të rënda të frymëmarrjes mes 31 dhjetorit dhe 2 janarit.
Mendohet se ajo është infektuar gjatë trajtimit të një pacienti me probleme të rënda respiratore, i cili ndërroi jetë para se të mund të kryheshin analizat për virusin Nipah.
Kontrolle të shtuara në aeroporte
Në përgjigje të situatës, Ministria e Shëndetësisë Publike e Tajlandës ka vendosur kontrolle shëndetësore për pasagjerët që mbërrijnë nga Bengali Perëndimor në aeroportet kryesore të vendit.
Udhëtarët kontrollohen për temperaturë dhe simptoma të tjera të virusit Nipah, si dhimbje koke, dhimbje fyti, të vjella dhe dhimbje muskulore, dhe pajisen me karta informuese që shpjegojnë çfarë duhet të bëjnë nëse shfaqin shenja sëmundjeje.
Edhe Aeroporti Ndërkombëtar i Phuket-it po i nënshtrohet pastrimit të shtuar për shkak të fluturimeve direkte me Bengalit Perëndimor, megjithëse deri tani nuk është raportuar asnjë rast në Tajlandë. Mediat lokale raportojnë se udhëtarët me temperaturë të lartë ose simptoma të dyshimta mund të dërgohen në ambiente karantine.
Nepali ka rritur nivelin e alarmit në Aeroportin Ndërkombëtar Tribhuvan në Katmandu dhe në pikat kufitare tokësore me Indinë. Ndërkohë, Tajvani ka njoftuar se po shqyrton përfshirjen e virusit Nipah në Kategorinë 5 të sëmundjeve të detyrueshme për raportim – niveli më i lartë për infeksionet serioze të reja – që kërkon njoftim të menjëhershëm dhe masa të veçanta kontrolli.
Qendrat për Kontrollin e Sëmundjeve në Tajvan kanë mbajtur gjithashtu në fuqi alarmin e udhëtimit të nivelit 2 (“i verdhë”) për shtetin indian Kerala, duke këshilluar kujdes të shtuar për udhëtarët.
Deri tani nuk janë raportuar raste jashtë Indisë dhe nuk ka shenja për përhapje në SHBA apo në Amerikën e Veriut. Megjithatë, reagimi tregon seriozitetin me të cilin autoritetet po e trajtojnë rrezikun.
Sa i rrezikshëm është virusi Nipah?
Sipas Organizatës Botërore të Shëndetësisë, shkalla e vdekshmërisë nga virusi Nipah varion nga 40 deri në 75 për qind, kryesisht për shkak të dështimit të frymëmarrjes dhe ënjtjes së trurit (encefalit).
Edhe pse mbetet i rrallë, ekspertët paralajmërojnë se Nipah ka potencial të shkaktojë sëmundje shkatërruese kur shfaqet.
Çfarë është virusi Nipah dhe si përhapet?
Nipah është një infeksion zoonotik, që do të thotë se transmetohet nga kafshët te njerëzit. Ai lidhet kryesisht me lakuriqët e natës frutngrënës dhe, në disa shpërthime, edhe me derrat.
Virusi mund të shkaktojë një spektër të gjerë simptomash – nga mungesë e plotë e tyre, deri te sëmundje e rëndë që prek mushkëritë dhe trurin. Në rastet e lehta, simptomat i ngjajnë gripit, por në rastet e rënda mund të shfaqen vështirësi të rënda në frymëmarrje, kriza epileptike dhe encefalit fatal.
Një tjetër arsye shqetësimi është aftësia e virusit për t’u transmetuar nga njeriu te njeriu, veçanërisht mes anëtarëve të familjes dhe personelit kujdestar, çka e bën thelbësor kontrollin e rreptë të infeksioneve.
Pse po kryhen kontrolle në aeroporte?
Kontrollet janë shtuar pasi rastet u zbuluan në ambiente spitalore – vende ku viruset mund të përhapen shpejt nëse nuk izolohen në kohë. Masat synojnë identifikimin e hershëm të rasteve dhe parandalimin e kalimit të infeksionit përtej kufijve.
Autoritetet përdorin deklarata shëndetësore, matje të temperaturës dhe skanerë termikë për të identifikuar udhëtarë me simptoma. Personat e dyshuar mund t’i nënshtrohen vlerësimeve të mëtejshme mjekësore dhe gjurmimit të kontakteve.
Simptomat dhe vdekshmëria
Simptomat fillestare përfshijnë ethe, dhimbje koke, dhimbje muskujsh, të vjella dhe dhimbje fyti. Në disa raste, sëmundja përparon shpejt në çrregullime neurologjike, konfuzion, përgjumje ekstreme, kriza dhe koma brenda 24–48 orëve. Mund të shfaqen edhe pneumoni atipike dhe insuficiencë e rëndë respiratore.
Periudha e inkubacionit zakonisht zgjat 4–14 ditë, por në raste të rralla mund të arrijë deri në 45 ditë.
Trajtimi dhe parandalimi
Aktualisht nuk ekziston vaksinë apo trajtim specifik kundër virusit Nipah. Mjekët mbështeten në trajtim intensiv simptomatik, duke u fokusuar në menaxhimin e komplikacioneve më të rrezikshme neurologjike dhe respiratore.
Shumë të mbijetuar shërohen plotësisht, por disa mund të mbeten me dëmtime neurologjike afatgjata, ndërsa në raste të rralla janë raportuar rikthime të sëmundjes.